F.B.
Pashke Marku ka vendosur të tërhiqet nga ekipi kombëtar i Kosovës në hendboll. Njëra prej hendbollisteve më të rëndësishme të Kosovës ka njoftuar të mërkurën se më nuk do të luaj në nivel kombëtaresh.
“Nuk do të luaj më. Ka pasur vlerë shumë të madhe për mua paraqitja për shtetin tim. Jam e lumtur që kemi arritur kaq shumë për këto gjashtë vjet. Rritja me të vërtetë ishte shumë e madhe. Ka shumë punë, por edhe ecja para ishte shumë e madhe. Me shumë kënaqësi dhe krenari kam veshur fanellën e Kosovës. Kam mundur të luaj për Zvicrën, por kam vendosur për Kosovën pasi e kam ditur se luajmë me zemër. Kemi luftuar për njëra-tjetrën, kemi punuar bashkë dhe kjo ishte e veçantë për mua”, ka thënë Marku.
Marku është e rritur në Zvicër, ku do të vazhdojë të luaj për skuadrën elitare Kreuzlingen. Ajo te Kosova ka mbuluar me sukses të plotë pozitën e alos së majtë.
