Lista Serbe nëpërmjet një reagimi në Facebook është deklaruar lidhur me vrasjen e rreshterit të Policisë së Kosovës, Afrim Bunjaku. Ata kanë fajësuar qeverinë Kurti, teksa kanë epretenduar se ata kanë bërë thirrje për paqe.
Madje ky subjekt politik ka kërkuar hetim për vrasjen e dy serbëve që ishin pjesë e grupit terrorist.
“Do të kërkojmë hetim për vrasjen e së paku dy serbëve të vrarë gjakftohtë edhe pse janë dorëzuar. E pyesim bashkësinë ndërkombëtare pse EULEX-i nuk mori pjesë në operacion, por vetëm policia e Kurtit?”, shkruan Lista Serbe në Facebook.
Lista Serbe tutje ka thënë se kanë nevojë urgjente që KFOR-i dhe EULEX-i të vendosen në veri dhe të parandalojnë përshkallëzimin e mëtejshëm të situatës.
“Prej më shumë se një viti ne paralajmërojmë se regjimi në Prishtinë po ushtron presion mbi serbët dhe çdo ditë po përshkallëzon situatën dhe po provokon reagimin e popullit. Kërkuam nga KFOR-i që të ngrejë forcat e veta dhe të veprojë në mënyrë parandaluese, kërkuam nga bashkësia ndërkombëtare që ta frenonte Kurtin, gjithmonë bënim thirrje për paqe… por më kot. Fatkeqësisht, ndodhi ajo që dëshiroi Kurti”, thuhet në deklaratën e Listës Serbe.