Shefi i zyrës për Kosovën në qeverinë e Serbinë, Petar Petkoviq, e ka quajtur kryeministrin Albin Kurti “vajzë të vogël” kur flet me presidentin e Serbisë, Aleksandar Vuçiq në Bruksel.
Këtë reagim, Petkoviqi e bëri pasi Kurti të enjten e priti në takim kryetarin e Partisë Aksioni Demokratik në Sanxhak (SDA), Sulejman Ugljanin, kur edhe e shfaqi flamurin jozyrtar të Sanxhakut.
“Kurti po mendon se është hero kur shpalos të ashtuquajturin flamur të Sanxhakut, por në fakt është një vajzë vërtetë e vogël kur flet me presidentin Vuçiq në Bruksel”, shkroi Petkoviqi në X, ish-platforma Twitter, raporton Klankosova.tv.
Tutje, Petkoviqi i tha Kurtit se me këto veprime, ai nuk po e di se “po luan me zjarrin”.
“Separatisti i mprehtë Kurti nuk duhet të ushqejë dëshirat e politikanëve të dështuar nga Novi Pazari, sepse ai nuk se po luan me zjarrin”, deklaroi politikani serb.
Kryeministri Albin Kurti, së bashku me Këshilltaren Politike Ardita Sinani, të enjten pritën në takim kryetarin e Partisë Aksioni Demokratik në Sanxhak (SDA), Sulejman Ugljanin, deputetin shqiptar në Parlamentin e Serbisë, Shaip Kamberi, përfaqësuesit politikë boshnjakë në Serbi, Esad Salihoviq, Selma Kucevic, Ado Kamenisqanin, dhe kryetarin e Këshillit Kombëtar Shqiptar në Serbi, Nevzad Lutfiu.
Në takim thuhet të jetë diskutuar për brengat dhe shkeljet të cilat në mënyrë të vazhdueshme i përjetojnë si pakica shqiptare, ashtu edhe ajo boshnjake në Serbi, dhe për atë se çfarë mund të bëhet së bashku për të përmirësuar këtë gjendje.
