Partia Socialdemokrate e Kosovës, nëpërmjet një aksioni simbolik, ka protestuar ndaj ambasadorit të Kosovës në Kroaci.
Sipas PSD-së, Martin Berishaj s’po del të jetë ambasador. “Ai është tregtar i mafisë së energjisë së Ballkanit me petkun e ambasadorit”, deklaroi Nol Nushi nga kjo parti.
Para ndërtesës së Ministrisë së Punëve të Jashtme dhe Diasporës, PSD-ja ka vendosur një litar në të cilin në mënyrë simbolike janë varur bankënota eurosh me portretin e Berishajt.
“Pushtetit ia vendosëm flamujt e Martin Berishajt, personifikimit të korrupsionit”, deklaroi Nushi, sipas të cilit, -“skandali i ambasadorit të Kosovës në Kroaci është skandali më i madh në Kosovë”.
Megjithatë, sipas tij, presidentja e kryeministri e mbrojtën. “Ministrja e Punëve të Jashtme bile e shfajësoi; e njoh, tha, prandaj s’mund të jetë i fajshëm”.
Sipas PSD-së, është e qartë që pushteti në Kosovë është i ndërlidhur drejtpërdrejt me Berishajn.
“Është po ashtu e qartë që Martin Berishaj i ka fshehur bizneset e veta tek autoritetet e Kosovës, pasi ai nuk e ka deklaruar pasurinë e tij”.
Sipas PSD-së, për këtë Berishaj duhet të jap përgjigje para prokurorisë.
“Por, mbi të gjitha, ai dhe pushteti bashkë me të duhet të japin përgjegjësi politike për këtë skandal të përmasave ballkanike”.
Mediat sllovene kanë raportuar mbi dyshimet se ambasadori Berishaj është i përfshirë në një skandal financiar transaksionesh.
Në lidhje me këtë çështje, ministrja e Punëve të Jashtme e Diasporës, Donika Gërvalla, deklaroi se ashtu sikurse herën e kaluar kur janë ngritur këto spekulime, edhe tani, ka kërkuar nga shtetet që përmenden në raportimet e mediave sllovene në lidhje me këto pretendime, informacione në rrugë zyrtare.
