Frashër Krasniqi nga Partia SocialDemokrate ka thënë se dialogu në Bruksel po del që e ka pasur Asociacionin në qendër dhe jo njohjen reciproke, ashtu siç kishte paralajmëruar ky subjekt politik.
Ai gjatë magazinës “Lajmet e Fundit” në RTK ka deklaruar se kur kryeministri Kurti thoshte se ky është dialog me njohje në qendër, PSD kishte thënë me bindje se dialogu e ka asociacionin në qendër.
“Neve na akuzonin se këtë po e themi për inati se Albin Kurti po e bën punën mirë. E sot ministrja kryesore e Kurtit, Donika Gërvalla del e thotë Kosova e ka bërë kompromisin e madh duke mos e kërkuar njohjen nga Serbia. Pra, në fund po del se qendra e gjithë këtij procesi ka qenë Asociacioni. Albin Kurti e ka ditë këtë punë dhe e ka pranuar këtë format”, ka thënë Frashër Krasniqi.
Ai ka thënë se si parti politike qysh në fillim të këtij procesi kanë paralajmëruar se nëse e pranon këtë format, do të vish deri te një përfundim i tillë – që është Asociacioni.
“Është dashur ta kishte një alternativë qysh me zgjidh problemin me Serbinë, çfarëdolloj kompromisi. Nuk është ideja mos me bë kompromis por që ai ta sigurojë njohjen dhe marrëveshjen e përhershme dhe që nuk lë konflikt të vazhdueshëm”, ka shtuar Krasniqi.
Ai tutje ka thënë se Albin Kurti e ka pranuar Asociacionin në Bruksel dhe Ohër, por tani sipas tij ai po dëshiron të marrë kohë me sekuencimin.
