Kryeministri Albin Kurti mori sot pjesë në hapjen e Lojërave parasportive “Kosova 2023”, të organizuara nga Komiteti Paralimpik i Kosovës (KPK) që u mbajt në Akademinë e Kosovës për Sigurinë Publike në Vushtrri dhe u premtoi këtyre pjesëmarrësve mbështetje nga ekzekutivi kosovar.
Me këtë rast, Kurti tha se ky komitet ka korrur suksese të pa mohueshme që e ndihmojnë sportin, i ndihmojnë personat me aftësi të kufizuara dhe e afirmojnë Kosovën në arenën ndërkombëtare.
Teksa përshëndeti të gjithë të pranishmit, kryeministri falënderoi veçanërisht mysafirët të cilët kanë ardhur nga Kroacia, Maqedonia e Veriut dhe Mali i Zi.
“Andaj le të shikojmë ndeshje në kuadër të atyre se çfarë janë planifikuar e përgatitur për sot, le të argëtohemi bashkë dhe sa më shumë le të shoqërohemi në mënyrë që ta mbështesim e ta ndihmojmë njëri tjetrin e natyrisht më së shumti të gjithë ata persona që janë me nevoja të veçanta apo me aftësi të kufizuara’”, u shpreh kryeministri.
Kurti uroi dhe shprehu përgëzime për punën angazhimin dhe kontributin që po e jep Komiteti Paralimpik i Kosovës.
Këtë vit, Lojërat Parasportive do të përfshijnë 13 disiplina sportive në total.
Mbështetja financiare për Komitetin Paralimpik të Kosovës është rritur për mbi 500 për qind. Nga 15 mijë euro sa e kishte deri në vitin 2020, për vitet 2022 dhe 2023 KPK ka buxhet prej 100 mijë euro për vit.
