Sonte festivali ndërkombëtar i filmit “Pri Fest”vazhdon t’i sjellë publikut në Prishtinë filma, debate e muzikë. Premierë vendore do të ketë filmi me bashkëprodhim mes Kosovës e Kroacisë, “Escort”.
Ky film nga Lukas Nola trajton fatin e personazhit Miro, i cili në një udhëtim pune kalon natën me një eskortë e cila vdes. Të përfshirë në mbulimin e vdekjes janë punëtorët e hotelit, të cilët kthehen në kërcënim për Miron.
Detaje për ditën e sotme ka dhënë drejtori i “Pri Fest”, Fatos Berisha në një lidhje të drejtpërdrejtë në “Mirëmëngjesi Kosovë” të RTK-së.
“Ky film është nga Kroacia por Kosova është bashkëprodhuese me bashkëproducentin kosovar Fatmir Spahiu, kemi edhe aktorë kosovar që luajnë aty duke përfshirë Fatmirin, Ilir Prapashticën dhe Bashkim Malajn”, tha për RTK-në drejtori Berisha.
Ndërkaq gjatë ditës në kuadër të programit të filmave të shkurtër do të shfaqen “Palma”si premierë botërore nga Mali i Zi, “Road Tripper” nga Franca vjen si premierë regjionale dhe në fund shfaqet një premierë botërore sërish nga Franca “Denise est mort ce souir”. RTKlive
