Gjykata Themelore në Prishtinë ka shpallur aktgjykim lirues pwr Bedri Krasniqin lidhur me akuzën për vrasjen e dy zyrtarëve policorë në vitin 2004 në Podujevë, kurse Alban Dezdari u dënua me 8 vjet burgim për veprën penale “Ndihmë në kryerjen e veprës penale vrasje”.
Sipas aktgjykimit, nuk është provuar se Krasniqi ka kryer veprën penale që i vihej në barrë. Shpenzimet e procedurës penale bien në barrë të gjykatës.
Kurse, Dezdari u shpall fajtor dhe u dënua me 8 vjet burgim për veprën penale “Ndihmë në kryerjen e veprës penale vrasje”, kurse u lirua nga akuza për “Vrasje të rëndë e mbetur në tentativë”. Atij do t’i llogaritet në dënim edhe koha e kaluar në paraburgim, raporton Betimi në Drejtësi.
Aktgjykimi ndaj dy të akuzuarve është shpallur të mërkurën nga Gjykata Themelore në Prishtinë.
Aktakuza lidhur me këtë rast ishte ngritur më 21 korrik të vitit 2017, me të cilën të akuzuarit i ngarkonte me veprën penale vrasja e rëndë dhe vrasja në tentativë.
Të akuzuar të tjerë në këtë rast për vrasjen e policit të Kosovës dhe të policit të UNMIK-ut kanë qenë edhe Bajram Kiçmari, Faik Shaqiri, por pas marrjes së aktvendimit nga Gjykata Supreme në shtator 2017, ata ishin liruar pasi që të dy të akuzuarit ishin gjykuar vite më parë dhe se ka një aktgjykim për pushimin e hetimeve kundër tyre.
