F.B.
Përfaqësuesi Special i Bashkimit Evropian për Dialogun Kosovë-Serbi, Miroslav Lajçak, të mërkurën do të jetë në Beograd, ku do të takohet me presidentin e Serbisë, Aleksandër Vuçiq, në kuadër të përgatitjeve për takimin e ardhshëm të nivelit të lartë në Dialogun e Brukselit.
Nga kabineti i Vuçiqit nuk kanë bërë të ditur se cilat do të jenë temat e bisedës, pas së cilës dy zyrtarët nuk janë paraparë të flasin para mediave.
Lajçak, ka njoftuar mbrëmë se në margjinat e Forumit Strategjik të Bled-it, ka pasur një takim të rëndësishëm me kryeministrin e Republikës së Kosovës, Albin Kurti, pjesë e përgatitjeve për takimin e radhës të nivelit të lartë, i cili duhet të mbahet në shtator.
“Tema kryesore e bisedës sonë ishin përgatitjet për takimin e ardhshëm të dialogut të nivelit të lartë në shtator, me fokus normalizimin e marrëdhënieve dhe zbatimin e njoftimit të BE-së të datës 3 qershor”, ka shkruar Lajçak në rrjetin social ‘X’ i njohur më parë si ‘Twitter’.