Ndaj vendimit të ministrit të Bujqësisë, Faton Peci, për lirimin e pronës së Institutit për Hulumtime Shkencore në Bujqësi që gjendet në lagjen “Ulpiana” në Prishtinë ka reaguar Yll Bogaj, i cili pretendon se është pronar i vetëm i ligjshëm i kësaj prone.
Ministri Peci nëpërmes një video sot ka bërë të ditur se e ka nënshkruar vendimin për lirimin e kësaj prone, në të cilën, sipas tij, “janë ndërtuar ilegalisht 700 metra lokale afariste, është bërë tjetërsim dhe bartje e pronës nga shtetërore në private, është shndërruar oborri në depo, ndërsa s’ka pasur veprim nga pesë ish-ministra”.
Ndërkohë, Yll Bogaj, vlerëson se është pronar legjitim i kësaj prone dhe ka paralajmëruar padi ndaj ministrit Peci. ”Jemi të detyruar që të reagojmë publikisht ndaj një videoje të ministrit të Bujqësisë, Faton Pecit, përmes së cilës, ai e ka etiketuar pronën tonë private si pjesë e Institutit të Bujqësisë, duke synuar shantazhin publik, frikësimin dhe shpronësimin tonë nga ‘shenjtëria’ dhe paprekshmëria e të drejtës pronësore e garantuar me ligj, kushtetutë dhe me norma e parime universale. Videoja shantazhuese e Faton Pecit, është vazhdimësi e shantazhit të tij publik që na është bërë tash e një vit të plotë. Për më tepër, kulmi i çdo gjeje ka qenë dje kur kemi pranuar një ‘Vendim’ të Faton Pecit, i cili në mënyrë krejtësisht arbitrare na kërkon që ta lirojmë pronën tonë legale brenda shtatë ditësh, nën kërcënimin e largimit tonë me forcë nga prona jonë private”, ka shkruar Bogaj në Facebook.
Ai tutje ka thënë se janë të hapur për organet kompetente që kanë nevojë të konfirmojnë vërtetësinë e pronës private të bazuar në certifikata pronësore.
“Objekti të cilin e kemi në pronësi, është objekt banesor i blerë në mënyrë legjitime e legale nga personat fizik, përmes kontratave të lidhura pranë organeve kompetente, e jo nga Instituti i Bujqësisë. Që nga periudha kur jemi pronar legjitim të kësaj pasurie, ne paguajmë tatim në pronë dhe detyrimet tjera përkatëse. Për më tepër, historiku i objektit bashkë me të drejtat pronësore që kanë ekzistuar në atë objekt janë të evidentueshme. Këto i ka ditur shumë mirë dhe i din edhe Faton Peci, pasi që i njëjti, ju ka shkruar institucioneve tjera duke ju referuar pronarit të vërtetë me certifikata pronësore, saktësisht neve”, ka shkruar tutje Bogaj.
Ai po ashtu ka thënë se e ka paditur Ministrinë e Bujqësisë në vitin 2016 për definimin e kufirit pronësor dhe që nga ajo kohë sipas tij janë duke pritur shtjellimin e çështjes gjyqësore.
