Edhe profesori i universitar Milazim Krasniqi e ka përkrahur idenë që politikanëve t`u bëhet testi i varësisë nga droga.
Ai gjithashtu ka kërkuar nga mjekët që të mos i fshehin diagnozat psikiatrike të liderëve politikë dhe narkomaninë eventuale të politikanëve.
Në profilin e tij në “Facebook”, Krasniqi ka shkruar se kush e bënë këtë duhet të ndiqet penalisht.
“Ideja që politikanëve t’u bëhet testi i varësisë eventuale nga drogat është shumë e mirë. Përtej kësaj, mjekët që fshehin diagnozat psikiatrike të liderëve politikë dhe narkomaninë eventuale të politikanëve, do të duhej të ndiqeshin penalisht si kriminelë. Pse? Sepse fshehja e tillë mund të jetë shkak për krimet që mund të bëjnë liderët e sëmurë psikikisht, ose që janë nën varësinë e drogave”, ka shkruar Krasniqi.
Sipas tij, kontrolli psikiatrik për liderët duhet të bëhet standard botëror.
“Ka ardhë koha që edhe në nivel botëror psikiatria të konsultohet, me rastin e kandidimit të njerëzve për të marrë udhëheqjen e qeverive e shteteve. Ndoshta ka ardhë koha edhe për një një rezolutë të OKB-së, e cila do ta definonte këtë problem, siç e definon Konventa e vitit 1948 krimin e gjenocidit. Në fund të fundit, krimin e gjenocidit e shkaktojnë njerëzit jonormalë”, ka shkruar Krasniqi.
