Policia e rajonit të Ferizaj ka angazhuar të gjitha kapacitetet për të pambushur operacionin “Goditja” që ka filluar me 8 gusht, dhe në rajonin e këtij qyteti që përfshinë edhe Kaçanikun , Shtimen, Shtërpcën dhe Hanin e Elezit ka legjitimuar rreth 2 mijë persona dhe ka konfiskuar 5 armë.
“Policia Rajonale e Ferizajt nga data 08.08.2023 ka shtuar masat e sigurisë në rajonin e Ferizajt, ku janë angazhuar të gjitha stacionet e rendit : Ferizaj, Kaçanik , Shtime, Shtërpcë dhe Hani i Elezit dhe njësitet nga Sektori i Hetimeve Rajonale, Njësia e Reagimit të Shpejtë dhe Njësia Rajonale e Komunikacionit Rrugor. Aktivitetet dhe patrullimet policore, kryesisht janë fokusuar në qendra urbane, në ato pjesë ku ka më shumë lokale, kafiteri, bare nate dhe frekuentim më të madh të qytetarëve”, njofton policia.
Sipas forcave të rendit, nga data 08 gusht janë realizuar 147 patrullime në zona urbane; 226 pika kontrolli të automjeteve; 26 pika kontrolli me alkool test; janë realizuar 67 pika kontrolli me radar; janë kontrolluar 1645 vetura; legjitimuar 1895 persona; janë kontrolluar 21 lokale; janë arrestuar 9 persona dhe janë konfiskuar 5 armë të zjarrit dhe sasi e municionit.
“Policia Rajonale e Ferizajt do të shtojë kontrollet policore ndaj personave, automjeteve dhe lokaleve me qëllim të gjetjes dhe konfiskimit të gjërave të ndaluara me theks të veçantë armëve dhe mjeteve tjera të rrezikshme për jetën”, thuhet më tej në njoftim. Policia Rajonale e Ferizajt po ashtu fton qytetarët për bashkëpunim.
