F.B.
Më 8 shtator në Heraklion të Greqisë mund t’i jepet Kosovës organizimi i Lojërave Mesdhetare.
Paraprakisht aty, në Asamblenë e Përgjithshme të Komitetit Ndërkombëtar të Lojërave Mesdhetare, do të dëgjohet një raport përmbledhës që lidhet me kushtet.
Në funksion të këtij raportimi, sot Komisioni vlerësues i ICMG-së, i kryesuar nga presidenti i Komitetit Olimpik të Maltës, Julian Pace Bonello dhe sekretari i përgjithshëm, Iakovos Filippousis kanë parë nga afër infrastrukturën sportive në vendin tonë për organizimin e Lojërave Mesdhetare Prishtina 2030, ka njoftuar Komiteti Olimpik i Kosovës.
“Komisioni i shoqëruar nga drejtuesit e KOK-ut, presidenti Ismet Krasniqi, sekretari i përgjithshëm, Besim Aliti dhe zyrtarja për marrëdhënie ndërkombëtare, Rejhan Halili, kanë vizituar stadiumin Fadil Vokrri, Pallatin e Rinisë dhe Sportit në Prishtinë, Palestrën 1 Tetori, kampin nacional të futbollit në Hajvali, si dhe Qendrën e Studentëve në Prishtinë.
Në stadiumet e futbollit, ata u mirëpritën edhe nga drejtuesit e FFK-së, kryetari Agim Ademi e sekretari i përgjithshëm, Taulant Hodaj”, ka njoftuar KOK. “Komisioni vlerësues do ta përgatis raportin përmbledhës, i cili do të prezantohet në Asamblenë e Përgjithshme të ICMG-së, që mbahet më 8 shtator 2023 në Heraklion të Greqisë, ku edhe pritet t’i jepet Kosovës organizimi i LM Prishtina 2030”.