Kushtet e motit ekstrem vijojnë të mbajnë mbërthyer Europën jugore. Temperatura 40 gradë celcius po shndërrohet në diçka normale në këtë sezon veror, ndërsa ka raste të veçanta kur termometri shkon deri në 47gradë, siç ishte rasti në Sardenja të Italisë.
Vala e të nxehtit, bashkë me thatësirën e madhe, vijojnë të ushqejnë vatrat e zjarrit. Prej ditësh Spanja, Turqia, Italia dhe Greqia po luftojnë me flakët, ndërsa po bëhen edhe evakuime të mëdha.
Situatë problematike paraqitet kryesisht në shtetin fqinj, pasi në Athinë rrezikohen shumë shtëpi dhe prona. 18 qytete janë nën regjimin e alarmit të kuq në Itali, përjashtuar disa zona të verilindjes që përjetoi në mesin e verës një stuhi breshëri të dhunshme.
Në rajonin e Venetos janë shkatërruar disa hektarë të trashëgimisë pyjore. Në media raportohet se ka rënë breshër në madhësinë e topave të tenisit. E njëjta stuhi e motit të keq është shtrirë edhe në disa shtete të Ballkanit.
Të paktën pesë persona raportohet se kanë humbur jetën në Kroaci, Bosnje e Hercegovinë dhe Slloveni. Stuhia la të plagosur dhe dhjetëra të tjerë.
Stuhia errësoi papritur qiellin dhe solli shi, përmbytje të shpejta dhe erëra në të gjithë Zagrebin duke shkaktuar probleme në qarkullim. Ndërkohë, edhe në Serbi, autoritetet lëshuan paralajmërime për qytetarët që të bëjnë kujdes, pasi stuhia e motit të keq po kalon dhe në atë shtet. /A2CNN
