Në Dhomat e Specializuara të Kosovës (DhSK) në Hagë, me përfundimin e dëshmisë së dëshmitarit të 15-të me radhë (me kodin 04586), gjykimi ndaj Hashim Thaçit, Kadri Veselit, Rexhep Selimit dhe Jakup Krasniqit do të rinis më 14 gusht 2023.
Dëshmitari me kodin 04586 ka dëshmuar përmes video-lidhjes, raporton ‘‘Betimi për Drejtësi’’.
Duke qenë se ekipet e mbrojtjes nuk kanë pasur pyetje për këtë dëshmitar, seanca ka vazhduar me pyetjet e trupit gjykues.
Me pyetje ka filluar anëtari i trupit gjykues, gjykatësi Guenawl Mettraux, i cili e ka pyetur atë nëse i njëjti i kishte raportuar dikujt atë që i kishte ndodhur anëtarit të familjes së tij, e që dëshmitari u përgjigj me ‘‘po’’.
Ndërkaq, kur u pyet se kujt ia kishte treguar këto ngjarje, DhSK-ja ka vendosur që përgjigja e dëshmitarit të ketë përmbajtje të redaktuar dhe kështu ka mbetur edhe pjesa tjetër e përgjigjeve të tij.
Më tej, një pjesë e shkurtë e deklarimit të tij ka qenë në seancë publike por që ka qenë e pamundur të kuptohen plotësisht deklarimet e dëshmitarit.
Në këto rrethana, dëshmia e tij ka përfunduar dhe se gjykimi për këtë çështje gjyqësore do të rinis më 14 gusht, pas pushimit të Gjykatës Speciale, me dëshmitarët e radhës.
Ndryshe, kryetari i trupit gjykues, gjykatësi Charles Smith paraprakisht tregoi se të akuzuarit Thaçi, Veseli, Selimi dhe Krasniqi kanë hequr dorë nga prania e tyre në sallë për këtë seancë dhe të njëjtën e kanë përcjellë përmes video-lidhjes.
Dëshmitari i 15-të me radhë (me kodin 04586) në gjykimin ndaj Hashim Thaçit dhe të tjerëve në Dhomat e Specializuara të Kosovës (DhSK) në Hagë, po vazhdon dëshminë e tij edhe gjatë seancës së të enjtes.
Ndryshe në seancën e së mërkurës u lexua përmbledhja e deklaratës së tij nga Zyra e Prokurorit të Specializuar (ZPS), raporton ‘‘Betimi për Drejtësi’’.
Ndërkaq, nga ZPS nuk ka pasur pyetje për dëshmitarin e pyetjet nga mbrojtësi i viktimave kanë qenë me përmbajtje të redaktuar.
Por, pasi që gjatë asaj seance dëshmitari ka treguar se ka probleme shëndetësore, me fillimin e seancës së sotme, ekipet e mbrojtjes kanë deklaruar se janë dakorduar se nuk do t’i bëjnë pyetje dëshmitarit me kodin 04586.
Kurse, trupi gjykues ka bërë të ditur se do të bëjnë pyetjet e tyre.
Seanca po vazhdon në sesion publik.
Paraprakisht, kryetari i trupit gjykues, gjykatësi Charles Smith ka dhënë një urdhër me gojë me të cilin kanë vendosur që të shtyhen afatet për përgjigje për ekipet mbrojtëse lidhur me mocionin e dytë të prokurorisë sipas rregullës 155 dhe atë për 20 ditë nga shpërndarja e mocionit.
Gjatë muajit prill ka filluar gjykimi derisa në seancën e 3 prillit, Zyra e Prokurorit të Specializuar (ZPS) dhe mbrojtësi i viktimave kanë paraqitur deklarimet hyrëse dhe pas leximit të aktakuzës së ndryshuar nga ana e ZPS-së, ish-presidenti Hashim Thaçi, ish-kryeparlamentarët Kadri Veseli dhe Jakup Krasniqi, si dhe ish-deputeti Rexhep Selimi, u deklaruan të pafajshëm për veprat penale që iu vihen barrë.
