F.B.
Gjykata Themelore në Prishtinë ka shpallur aktgjykim dënues ndaj Driton Gashit, ish-shef i Agjencisë së Kosovës për Inteligjencë, duke e dënuar me 4 vjet e 8 muaj burgim, kurse janë liruar nga akuza Valon Krasniqi, ish-drejtor i Departamentit për Shtetësi, Azil dhe Migracion në Ministrinë e Punëve të Brendshme dhe Rrahman Sylejmani ish-drejtor i Drejtorisë për Migracion dhe të Huaj në kuadër të Policisë Kufitare, të cilët akuzoheshin për korrupsion në rastin e njohur si “Gylenistët”.
Aktgjykimi ndaj tyre u shpall të mërkurën nga kryetarja e trupit gjykues gjykatësi, gjykatësja Violeta Namani, raporton “Betimi për Drejtësi”.
Ndaj ish-shefit të AKI-së Driton Gashit Gjykata ka shqiptuar edhe dënim plotësues, ndalimi i ushtrimit të funksioneve në administratën publike në kohëzgjatje prej katër vjetësh pas mbajtjes se dënimit me burgim.
Ndërsa, të akuzuarit Valon Ramadani dhe Rrahman Sylejmani lirohen nga akuza pasi nuk është provuar se të njëjtët kanë kryer veprat penale që u vihen në barrë.
Sipas këtij aktgjykimi, i akuzuari Gashi obligohet të paguajë edhe shpenzimet procedurale dhe atë shumën prej 1 mijë eurove në emër të paushallit gjyqësor, si dhe shumën prej 100 eurove për fondin e kompensimit te viktimave të krimit.
Ndërsa, shpenzimet procedurale lidhur me të akuzuarit Ramadani dhe Sylejmani bien barrë e mjeteve buxhetore të Gjykatës.
