Presidenti Joe Biden përfundoi udhëtimin e tij evropian me një vizitë në Finlandë, ku u takua me udhëheqësit e anëtarit më të ri të NATO-s dhe të vendeve të tjera nordike. Siç njofton nga Helsinki korrespondentja e Zërit të Amerikës në Shtëpinë e Bardhë, Patsy Widakuswara, konflikti në Ukrainë ka hedhur një hije mbi të ardhmen e kontinentit.
Nga kryeqyteti i Finlandës, presidenti Joe Biden siguroi vendin më të ri anëtar të NATO-s për angazhimin e aleancës. Ai u përpoq të zbuste shqetësimet evropiane se një ndryshim në administratën amerikane mund të nënkuptojë lidhje të pasigurta transatlantike.
Ju garantoj absolutisht për këtë. Nuk ka dyshim. Ka mbështetje dërrmuese të popullit amerikan”
Paraardhësi i presidentit Biden, Donald Trumpi pati thënë se NATO-s i ka ikur koha, duke shkaktuar shqetësim mes aleatëve.
Presidenti finlandez Sauli Niinistö tha se vendi i tij ndihet më i sigurt.
“80% e popullsisë sonë mbështet anëtarësimin në NATO dhe më shumë se 80% thonë se do të mbrojmë edhe aleatët tanë”.
Bëhet fjalë për mbrojtje nga agresioni i presidentit rus Vladimir Putin, për të cilin presidenti Biden tha se tashmë e kishte humbur luftën me Ukrainën.
“Putini ka vërtet një problem. Si të dalë nga kjo luftë? Çfarë të bëj?”, tha presidenti Biden.
Ky është një tjetër ndryshim nga zoti Trump, i cili u takua me Putinin në Helsinki pesë vjet më parë dhe tha se besonte se Rusia nuk ndërhyri në zgjedhjet amerikane të vitit 2016, pavarësisht provave të zbulimi.
Në Helsinki, presidenti Biden u takua gjithashtu me udhëheqës të vendeve të tjera nordike, Suedisë, Norvegjisë, Danimarkës dhe Islandës, të cilët tani janë anëtarë të NATO-s.
Ai u kthye në Uashington të enjten në mbrëmje./VOA/
