Podujevë – Drejtoria për Inspeksion në Komunën e Podujevës ka vazhduar gjatë ditës së sotme me rrënimin e vilave ilegale në Batllavë.
Lajmin e ka bërë të ditur zëdhënësi i Komunës së Podujevës, Fatri Zhitia.
Ai tha së në fazën e parë të rrënimit të këtyre objekteve janë rrënuar shtatë prej tyre, ndërsa kanë për t’u rrënuar edhe katër të tjera.
“Po është duke vazhdu një aksion për rrënimin e këtyre objekteve. Ky aksion ka filluar para disa muajve. Në fazën e parë janë rrënuar shtatë objekte dhe tani janë edhe katër objekte për tu rrënuar”, tha Zhitia.
Zëdhënësi Zhitia pohoi se në Batllavë janë edhe 59 objekte të tjera, të cilat janë pa leje ndërtimore.
“Ka edhe objekte të tjera të cilat janë të ndërtuara pa leje në atë zonë, mirëpo sa i përket masave ndaj tyre qytetarët mund të bëjnë ankesa dhe ne do t’i respektojmë të gjitha vendimet e ministrisë së Mjedisit të Planifikimit Hapësinor. Në atë zonë janë gjithsej 59 objekte pa leje”.
Ky aksion për rrënimin e objekteve pa leje në zonën e Batllavës kishte nisur me 24 nëntor 2022 ./Betimi për Drejtësi