Ambasadori i Serbisë në Shtetet e Bashkuara të Amerikës, Marko Gjuriq, ka thënë sonte se situata në veri të Kosovës tani për tani është deskaluar dhe pasi ia thuri disa lavde shefit të tij, Aleksandar Vuçiq, e kritikoi kryeministrin Albin Kurti që sipas tij ka qëllime të këqija ndaj serbëve lokal.
Sipas tij, nga Bashkimi Europian dhe Shtetet e Bashkuara të Amerikës kanë marrë garanci të shkruar se nuk do të arrestohen protestuesit e barrikadave dhe indikacione se në ditët dhe javët në vijim “do të bisedohet për formimin e Asociacionit”.
Gjuriq tha se kryeministri i Kosovës “nuk është njeri i preferuar në Washington”, ndërsa përmendi rastin e vitit 2015, kur deputetët e LVV-së e kishin sulmuar ambasadoren amerikane, Tracy Jacobson.
“Kurti tregoi se është shumë personal në çdo gjë që bën dhe me hidhërimin e tij personal në marrëdhëniet me Serbinë, arriti ta largojë një pjesë të njerëzve që tradicionalisht ishin përkrahës të tyre”, tha Gjuriq në një intervistë për televizionin serb, B92.
