F.B.
Junikasi e mbajti një konferencë për shtyp sot, ku foli për meçin që do ta zhvillojë me sfiduesin francez, Nadjib Mohammedi.
36 vjeçari premton se do ta japë maksimumin për t’i gëzuar mbi 10 mijë tifozë që pritet të jenë prezentë në stadiumin e kryeqytetit.
Boksieri kosovar do të zbresë në ring më 5 gusht në stadiumin “Fadil Vokrri” në meçin e tij të parë që e zhvillon në vendin ku i fle zemra.
“Emocionet shumë të rëndësishme, më bëjnë shumë krenarë pasi më në fund erdhi kjo mundësi. Këto do t’i shënoj si emocionet më të mira dhe dua t’i marr me vete në jetën time. Deri në momentet e fundit kur të bie gongu final, do ta shijoj çdo sekondë, si më të veçantit në jetën time. As titulli i kampionit të botës nuk më ka prekur më shumë sesa kur të boksoj në vendim tim. Do ta bëj lojën time, do ta bëj më të mirën, është një luftë e madhe, shumë e madhe, jo vetëm për veten time, por edhe për familjen time dhe për kombin tim, duke e bërë më të mirën”, u shpreh fillimisht Krasniqi në konferencë për shtyp.
Ndërkohë, kundërshtari i Krasniqit, Nadjib Mohammedi u shpreh po ashtu optimist para këtij meçi duke insistuar se nuk do të ketë problem që krejt stadiumi do të bëjnë tifo për boksierin kosovar.
“Sfida për mua do të jetë e njëjta, jam mësuar duke boksuar në Angli, në Las Vegas, gjithandej nëpër botë. Pjesa e njerëzve nuk më shqetëson, madje më motivon, më jep sfidë më të madhe. Në atë mbrëmje do t’i jap të gjitha mundësitë dhe shanset e mia”, deklaroi boksieri francez.
Këtë meç mezi po e pret edhe kryetari i Komunës së Prishtinës, Përparim Rama.
Krasniqi i ka 52 fitore e 7 humbje në boksin profesionist, kurse Mohammedi 45 fitore e 9 humbje.
