Presidentja Osmani duket se ka tejkaluar dilemat dhe pakënaqësitë që i kishte për marrëveshjet e nënshkruara në Bruksel dhe Ohër mes Kosovës dhe Serbisë. Ajo thotë se Kosova do t’i zbatojë ato në plotni.
Përveçse nuk ishte marrëveshja më e mirë e mundshme për të, Presidentja Osmani ka shprehur edhe pakënaqësi dhe zhgënjime rreth përmbajtjes së Marrëveshjes Bazë për normalizimin e raporteve Kosovë – Serbi dhe aneksit të saj, që njihet si Plani i Zbatimit, i pranuar më 18 mars në Ohër.
Sot, Presidentja, derisa fliste edhe njëherë për shkeljet që Serbia ua ka bërë marrëveshjeve, ajo u zotua se Kosova do t’i zbatojë ato.
“Sa i përket zbatimit të detyrimeve që dalin nga marrëveshjet e fundit në Bruksel dhe Ohër, ashtu siç kam thënë gjithnjë, më lejoni ta përsëris; Kosova nuk do t’u ikë detyrimeve të saj. Kosova do të zbatojë secilin detyrim për të cilin është pajtuar, si pjesë e këtij dialogu, përderisa e dimë të gjithë që marrëveshja thotë se të gjitha nenet e saj janë njësoj të rëndësishme”, tha Osmani.