KFF EP Hajvalia ka reaguar zyrtarisht pas akuzave të KFF Mitrovicës për kurdisje të ndeshjes finale të Kupës së Kosovës.
Hajvalia dhe Mitrovica do të përballen në finale të mërkurën. Njëherësh, këto janë dy rivalet më të mëdha në futbollin e femrave në Kosovë për momentin.
Këtë të hënë, klubi mitrovicas e lëshoi një komunikatë befasuese, përmes së cilës tha se do të mundohet ta japë më shumë se maksimumin në fushën e blertë pasi përballë do ta ketë një kundërshtar që ndeshjet po mundohet t’i kryejë jashtë fushës së blertë.
Kryetari i KFF Mitrovica, Hajrullah Haxhiu në një rrëfim ekskluziv për “Gazetën Express” tregon se rivalja kryesore, Hajvalia, kishte tentuar ta kurdiste ndeshjen kampionale mes tyre, të luajtur dy muaj më parë.
Ai zbuloi se klubi mitrovicas e posedon edhe një audio-incizim, të cilin e ka dërguar në Policinë e Kosovës, që e përfshin klubin kundërshtar, i cili, sipas Haxhiut, tenton ta blejë lojën mes tyre duke e shfrytëzuar së paku një futbolliste mitrovicase.
KFF EP Hajvalia, përmes një komunikate për media, ka mohuar kategorikisht këto akuza nga klubi i Mitrovicës, si dhe ka paralajmëruar padi ndaj tyre.
“KFF EP Hajvalia mohon pretendimin për kurdisje të ndeshjeve. Kjo veprim nga ana e skuadrës kundërshtare në prag të finales së madhe të Kupës së Kosovës, është vetëm shpifje nga ana e tyre. Skuadra jonë asnjëherë nuk ka bërë kurdisje të ndeshjeve dhe kjo gjë është konfirmuar në rezultatet tona. KFF EP Hajvalia do të përgatis një padi në drejtim të skuadrës për shpifje dhe prishje të imazhit të presidentit të skuadrës sonë, Xhavit Pacolli. Ky veprim është i ulët nga ana e tyre, sidomos në kohën kur në jemi duke bërë përgatitjet për finalen e madhe që do të zhvillohet të mërkurën”, thuhet në komunikatën e klubit nga Hajvalia.