F.B.
Në ditën Botërore të Ujit, 50 organizata të shoqërisë civile i janë drejtuar me një letër të hapur kryeministrit të vendit Albin Kurti.
Me këtë letër të hapur kryeministrit Kurti i është kërkuar takim urgjent lidhur me situatën kritike dhe mbrojtjen e lumenjve.
Në letrën e tyre thuhet se “Ministri Aliu ka braktisur mandatin demokratik të dhënë nga populli, duke përjashtuar publikun nga proceset vendimmarrëse dhe duke lejuar që lumenjtë e Kosovës të jenë nën kontrollin e operatoreve të hidrocentraleve, për të cilët çdo pikë ujë në lum është humbje në xhepat e tyre”.
Shpresa Loshaj, përfaqësuese e organizatës ‘Pishtarët’, ka shkruar në ‘Facebook’, se sot, në ditën Botërore të Ujerave, një zë i fuqishëm i 50 organizatave të shoqërisë civile, së bashku me organizatën ndërkombëtare Riverwatch, i janë drejtuar Kryeministrit Albin Kurti me një letër të hapur për të kërkuar ndërhyrjen e tij personale në çështjen e hidrocentraleve.
“Duke pasur parasysh dështimin dhe braktisjen e mandatit demokratik nga ministri Liburn Aliu dhe pasi qasja e tij është duke u bërë gjithnjë e më autoritare, me vendime anti kushtetuese, sulme kundër shoqërisë civile, dhe ushtrim të propagandës, ndërsa gjendja e lumenjve është alarmante”, tha ajo
Sipas saj, ata kanë kërkuar Anulimin e Udhëzimit Administrativ për Leje Mjedisore, të kaluar nga Ministri Aliu, i cili përjashton publikun nga proceset e vendimmarrjes si dhe, kemi kërkuar takim urgjent me Kryeministrin për t’i adresuar problemet të cilat Ministria e Mjedisit po dështon të adresojë dhe për t’i dhënë fund sulmeve të ministrit Aliu.
“Përtej gjendjes alarmante në të cilën ndodhemi, është e rëndësishme që shqetësimet tona të adresohen nga kryeministri Kurti, pasi dikur ai pat dhënë premtime personale për kujdesje për çështje të hidrocentraleve. U bënë tri vite që jemi duke pritur. Kohën nuk mund ta kthejmë pas, por sulmeve ndaj demokracisë dhe lumenjve tanë duhet t’u vijë fundi menjëherë. Kështu e përfunduam edhe letrën dhe presim përgjigje nga kryeministri Kurti”, tha ajo.
